वीरगञ्ज,२० फागुन । वीरगञ्जका युवा नेता ओमप्रकाश सर्राफ सिके राउत नेतृत्वको जनमत पार्टीमा प्रवेश गरेका छन् । काठमाण्डौस्थित जनमत पार्टी कार्यालयमै पार्टी अध्यक्ष डा. चन्द्रकान्त (सिके) राउतले सर्राफलाई पार्टीमा स्वागत गरेका हुन् ।
पर्साको वीरगञ्ज महानगरपालिका वडा नम्बर १६ नगवा निवासी सर्राफ लामो समयदेखि सामाजिक कार्यसँगै राजनीतिमा पनि सक्रिय छन् । २०७४ सालको प्रदेश सभाको निर्वाचनमा स्वतन्त्रबाट पर्सा क्षेत्र नम्बर १ (ख) बाट प्रदेश सभा सदस्यमा उम्मेदवारी दिएर सर्राफले राजनीतिक यात्राको आरम्भ गरेका थिए ।
५ सय ७१ मतका साथ चौथो स्थानमा रहेका सर्राफ लोकतान्त्रिक समाजवादी पार्टी (लोसपा) वीरगञ्ज महानगरको अध्यक्षसमेत बने । २०७९ सालको निर्वाचन नजिकिदै गर्दा पार्टीभित्रको आन्तरीक विवाद र असन्तुष्टीकै कारण उनले हाम्रो नेपाली पार्टीबाट उम्मेदवारी दिएका थिए ।
देशैभर स्वतन्त्रको लहर चलेको समयमा लौरो चुनाव चिह्नबाट जित्ने आशमा हाम्रो नेपाली पार्टीबाट उम्मेदवारी दिएपनि उनले अपेक्षित मत ल्याउन सकेनन् । २ हजार २९ मत मात्रै ल्याएका सर्राफ यसपटक पनि चौथो स्थानमै रहे ।
निर्वाचन सकिएसँगै उनी अब जनमत पार्टीमा प्रवेश गरेका छन् । उनलाई पार्टीका अध्यक्ष राउतसँगै उपाध्यक्ष दिपक साह, पार्टीका नेता बिपि साह लगायतले स्वागत गरेका हुन् ।
