वीरगञ्ज – पर्साको क्षेत्र नम्बर ४ का प्रतिनिधिसभा सदस्य उम्मेद्वार रमेश रिजालले जगरनाथपुरको लक्ष्मीपुरमा रहेको दलित वस्तिमा सहभोज गर्दै चुनावमा सहयोग गर्न आग्रह गरेका छन् ।
शुक्रबार साँझ जगरनाथपुर गाउँपालिकाको वडा नम्बर २ लक्ष्मीपुरमा अगुवा कार्यकर्तासँग भेट गर्दै वस्तिमै सहभोज गरिएको हो ।
सो अवसरमा लोसपाका नेता तथा स्थानीय अफताब आलमले चुनावमा पार्टी मात्रै नहेरी शिक्षित र योग्य उम्मेद्वार चयन गर्न सबैलाई आह्वान गरे । उनले भने, ‘अहिले पार्टी पार्टी भन्ने होइन, एउटा शिक्षित नेतालाई चुन्न जरुरी छ । औठाछाप नेतालाई जिताए आफूहरुको भविष्य अन्धकार हुने हुँदा कुशल र शिक्षित उम्मेद्वार रिजाललाई सबैले मिलेर जिताऔँ ।’
सत्तारुढ गठबन्धनबाट उम्मेद्वार रहेका रिजाल योग्य, कुशल र जनताको बीचमा रहने नेता भएकाले उनको पक्षमा सबै लाग्नु पर्नेमा उनको जोड थियो । विपक्षि उम्मेद्वार विभिन्न मुद्दै मुद्दा खेपेका, शोषक रहेको सबैलाई अवगत रहेकाले उनलाई यो चुनावबाट जवाफ दिनु पर्ने उनले बताए ।
कार्यक्रमलाई सम्बोधन गर्दै नेता रिजालले आफू सँधै जनताको पक्षमा, जनतासँगै रहेर काम गरेको स्मरण गर्दै अहिले पनि आफ्नो जित जनताकै हातमा रहेको बताए ।
प्रतिगामी शक्तिका साथै सोषक र सामन्तिलाई परास्त गर्न सबै एक जुट हुनुको विकल्प नभएको भन्दै उनले आउँदो चुनावमा एक जुट भएर लाग्न आह्वान गरे ।
लक्ष्मीपुरका मतदाताले रिजालको पक्षमा आफूहरु मतदान गर्न आतुर रहेको भन्दै यो साथ निरन्तर रहने प्रतिबद्धता जनाए ।
कार्यक्रममा कांग्रस पर्साका प्रवक्ता रमेश पान्डे, सह सचीव नवीन सिंह, महाधिवेशन प्रतिनिधि रामदेव चौहान, जगरनाथपुर गाउँपालिका अध्यक्ष श्रीकान्त यादव, लोसपाका नेता अफताब आलम लगायतका नेता तथा कार्यकर्ताको व्यापक उपस्थिति रहेको थियो ।
कार्यक्रम वडा नम्बर २ का नेपाली कांग्रेसका सभापति नेपाली प्रसाद कुशवाहाको अध्यक्षता समपन्न भएको हो ।
