स्वतन्त्र उम्मेदवारी दिए जसपाका निवर्तमान प्रदेश सभा सदस्य जन्नत अन्सारीले

२३ असोज, वीरगञ्ज
जनता समाजवादी पार्टी नेपालका निवर्तमान प्रदेश सभा सदस्य जन्नत अन्सारीले स्वतन्त्रतर्फबाट उम्मेदवारी दिएका छन् । ०७४ सालमा पर्सा क्षेत्र नं १ को (क)बाट निर्वाचित भएका अन्सारीलाई पार्टीले टिकट नदिएपछि स्वतन्त्र उम्मेदवारी दिएका हुन् ।
एमालेसँग चुनावी तालमेलका क्रममा पर्सा क्षेत्र नं १ को क एमालेको भागमा परेको छ । एमालेले संविधान सभा सदस्य विचारी यादवलाई चुनाव लडाउँदैछ । काँग्रेस नेतृत्वको पाँच दलीय गठबन्धनबाट माओवादी केन्द्रका रहबर अन्सारीले उम्मेवारी दिँदैछन् । ०७४ को निर्वाचनमा रहबर ६७९४ मत ल्याएर तेस्रो स्थानमा थिए ।
०७४ को निर्वाचनमा तत्कालिन संघीय समाजवादी पार्टीबाट ८५९३ मत ल्याएर अन्सारी प्रदेश सभा सदस्यमा निर्वाचित भएका थिए । उनको निकटतम प्रतिद्वन्दी नेपाली काँग्रेसका रामनारायण प्रसाद कुर्मीले ७१७१ मत ल्याएका थिए ।
पार्टीले आफ्नो कामको मुल्यांकन नगरेकोले स्वतन्त्र उम्मेदवारी दिएको अन्सारीले सञ्चारकर्मीहरुलाई बताएका छन् । ‘पार्टीले अन्याय ग¥यो, पाँच वर्ष जनताको सेवा गर्दा पनि मुल्यांकन गरिएन ।’ उनले भने ‘ जनता मेरो पछाडि छ । म जनताको सेवक हुँ, सेवा गर्न चाहिरहेको छु, जनता मसँग सेवा लिन चाहिरहेको छ । जनताको राय अनुसार नै उम्मेदवारी दिएको छु ।’
पर्सा क्षेत्र नं १ को क मा वीरगञ्ज महानगरपालिकाको १० वटा वडा पर्छ । १० वडाका जनताले नै जन्नत अन्सारी विकास प्रेमी हो कि के हो बताउने उनको तर्क छ । ‘लडाई त कस्तो हुन्छ, समयले बताउला, जनताको बलमा खडा भएको छु, चुनाव जित्छु भन्ने विश्वास छ । ’ अन्सारीले भने ।