वीरगञ्ज — पर्सा निर्वाचन क्षेत्र नम्बर २ का नेपाली कांग्रेसका प्रतिनिधिसभा सदस्य पदका उम्मेदवार अजयकुमार चौरसिया लाई समर्थन जनाउँदै नेकपा (एमाले) का जिल्ला सदस्यसहितका नेताहरू नेपाली कांग्रेसमा प्रवेश गरेका छन्।
शनिबार बिहान वीरगञ्ज महानगरपालिका वडा नम्बर २९ रतनपुर जसौलीमा आयोजित कांग्रेस उम्मेदवार चौरसियाको घरदैलो कार्यक्रमका क्रममा एमालेका जिल्ला सदस्य कारी महत्तो र वडा सदस्य जनक महत्तो सपरिवार नेपाली कांग्रेसमा प्रवेश गरेका हुन्।
कांग्रेस क्षेत्रीय सभापति महमद साहबुदिन का अनुसार नवप्रवेशीहरूलाई कांग्रेस उम्मेदवार चौरसियाले फुलमाला लगाएर पार्टीमा स्वागत गरेका थिए। स्थानीय तहमा प्रभावशाली मानिएका नेताहरूको प्रवेशलाई कांग्रेसले संगठन विस्तार र जनसमर्थन मजबुत हुने संकेतका रूपमा लिएको छ।
यसैबीच, वडा नम्बर २९ रतनपुर जसौलीमा भएको घरदैलोका क्रममा कांग्रेस उम्मेदवार चौरसियाले मतदाताहरूको घर–घरमै पुगेर प्रत्यक्ष संवाद गर्दै स्थानीय समस्या र आवश्यकता बारे जानकारी लिएका थिए। कांग्रेस नेता राकेश यादव का अनुसार चौरसियाले शिक्षा, स्वास्थ्य, रोजगारी र पूर्वाधार विकासका विषयमा मतदाताको गुनासा सुन्दै समाधानका लागि पहल गर्ने प्रतिबद्धता व्यक्त गरेका छन्।
घरदैलो कार्यक्रम तथा पार्टी प्रवेशले पर्सा–२ मा कांग्रेसप्रति बढ्दो आकर्षण देखिएको कांग्रेस वृत्तको निष्कर्ष छ।
