वीरगञ्ज । नारायणी अस्पतालको एक सय ३१ औँ वार्षिकोत्सवको अवसरमा आयोजित फुटसल प्रतियोगितामा नारायणी टाइगर्स विजयी भएको छ ।
बिहीबार वीरगञ्जको बाइपास सडकस्थित वल्र्ड अफ वाण्डर्समा भएको फाइनल खेलमा पेडियाट्रिक ठण्डर्सलाई नारायणी टाइगर्सले ४–३ गोल अन्तरले पराजित गरेको हो ।
१५–१५ मिनेट गरी आधा घण्टाको खेलमा नारायणी टाइगर्सको तर्फबाट डा. आमोद श्रेष्ठ एक्लैले तिन गोल गरे भने डा. भोला बच्छारले एक गोल गर्दै टिमलाई जित दिलाएको नारायणी टाइगर्सका कप्तान तथा गोल किपर डा. सरोज रोशन दासले जानकारी दिए ।
डा. दासले ६ हजार नगद पुरस्कार पनि प्राप्त गरे भने विजयी खेलाडीलाई प्रमाण पत्र र मेडल प्रदान गरिएको थियो । वार्षिकोत्सवको अवसरमा आयोजित सप्ताहव्यापी कार्यक्रमअन्तर्गत आइतवरदेखि भएको फुटसल प्रतियोगितामा ६ वटा समूहले सहभागिता जनाएका थिए ।
प्रतियोगितामा विजयी भएका खेलाडीहरूलाई नारायणी अस्पतालका मेडिकल सुपरिटेन्डेन्ट डा. चितरञ्जन साह, नारायणी खेल समितिका अध्यक्ष डा. खालीद हुसैन, नेपाल चिकित्सक सङ्घका केन्द्रीय उपाध्यक्ष एवम् मधेस प्रदेश संयोजक वरिष्ठ फिजिसियन डा. नीरज सिंह लगायतले मेडल र प्रमाण पत्र प्रदान गरेका थिए ।
