वीरगञ्ज । पहिलो पाइला नेपाल नामक सामाजिक संस्थाको वीरगञ्ज शाखाले नयाँ कार्यसमिति चयन गरेको छ । मधु प्रजापतिको अध्यक्षतामा संस्थाले प्रथम अधिवेशनबाट १३ सदसिय नयाँ कार्यसमिति चयन गरेको हो ।
शनिबार वीरगञ्जस्थित टाउन हल पार्टी प्यालेशमा सम्पन्न पहिलो पाइला नेपाल वीरगञ्ज शाखाको पहिलो अधिवेशनले सर्वसहमतिबाट प्रजापतिको अध्यक्षतामा १३ सदसिय नयाँ कार्यसमिति चयन गरेको संस्थाका निवर्तमान अध्यक्ष निश्चल प्रजापतिले जानकारी दिए । नयाँ कार्यसमितिको कार्यकाल दुई वर्षको हुनेछ ।
नयाँ कार्यसमितिको प्रथम उपाध्यक्षमा मनिष चालिसे, दोस्रो उपाध्यक्षमा राज साह कानु, सचिवमा भक्ति अग्रवाल, सह-सचिवमा म. इमरान अली, कोषाध्यक्षमा राहुलकुमार साह र सह-कोषाध्यक्षमा रोहित गुप्ता रहेका छन् । त्यस्तै सदस्यमा कृति श्रेष्ठ, विज्ञा चालिसे, प्रियानी माझी, सत्यप्रकाश कुमार, म. इर्साद अन्सारी र माधवी गुप्ता रहेका छन् ।
संस्थाकी केन्द्रीय अध्यक्ष प्रतिभा जेसीको प्रमुख आतिथ्यमा आयोजित कार्यक्रमको सभापति संस्थाका निवर्तमान अध्यक्ष निश्चल प्रजापति रहेका थिए ।
कार्यक्रममा प्रमुख अतिथि जेसी, शिक्षाविद् एवम् समाजसेवी डा. सुष्मा तिवारी द्विवेदी, विद्यार्थी नेता शिवम साह लगायतले आफ्नो मन्तव्य राख्दै नव निर्वाचित कार्यसमितिलाई आगामी कार्यकालको शुभकामनासहित बधाई दिए । वक्ताहरुले संस्थाले गरिरहेको कामलाई निरन्तरता दिँदै आगामी दिनमा आफ्नो कार्यक्षेत्रलाई अझै फराकिलो बनाउन आग्रह गरे ।
विभिन्न सामाजिक कार्यक्रमको आयोजना गर्नुका साथै अन्य सामाजिक क्रीयाकलापमा समेत आफ्नो दह्रो उपस्थिति जनाउँदै पहिलो पाइला नेपाल वीरगञ्ज शाखा छोटो समयमै एउटा प्रतिष्टित संस्था बन्न पुगेको छ ।
