कर्मचारी अभावका कारण सेवाग्राही मर्कामा

वीरगञ्ज । ईलाका प्रशासन कार्यालयमा कर्मचारी अभावका कारण सेवाग्राही मर्कामा छन् । पर्साको ग्रामीण भेगमा रहेको एक मात्र ईलाका प्रशासन कार्यालयमा कर्मचारी अभावका कारण सेवाग्राहीहरू मर्कामा परेका हुन् ।
पर्साको जिराभवानी गाउँपालिका–४ सुपौलीको ईलाका प्रशासन कार्यालयमा कर्मचारीको अभावमा सेवाग्राही मर्कामा परेका हुन । ७ जना कर्मचारी दरबन्दी रहेको ईलाका प्रशासन कार्यालयमा हाल ४ जना बाट कार्यालय सञ्चालन गर्दा सेवाग्राही मर्कामा परेको स्थानीय भरत चौधरीले बताउनुभयो ।
गत वर्ष हप्तामा २ दिन नागरिकता बन्ने प्रशासन कार्यालयमा हाल हप्तामा १ दिन बुधवार मात्रै बन्ने कारण सेवाग्राहीको भीडले गर्दा धेरै रितै हात फर्कने गरेको स्थानीयहरूले बताएका छन् ।
४ वटा पालिका जिराभवानी, जगरनाथपुर, पटेर्वासुगौली र ठोरीका जनताले नागरिकता लिन सुपौली धाउँदा पनि कर्मचारी अभावले गर्दा रितै हात फर्कनुपरेको स्थानीयको गुनासो छ ।
२०७५ साल पुस ११ गते स्थापना भएको इलाका प्रशासन कार्यालयका नायब सुब्बा बालबोद्ध कुमार ठाकुरका अनुसार एक जना अधिकृत, एक जना कम्प्युटर अपरेटर, एक जना सुब्बा थपियो भने प्रतिदिन नागरिकता वितरण गर्न सकिने छ ।
हाल कार्यरत कर्मचारीमध्ये अति आवश्यक कामले एक जना मात्रै बाहिर जाँदा काम गर्ने कठिनाइ हुने गरेको कर्मचारीहरू नै बताउँछन् ।
हप्ताको एक दिन बुधवार मात्रै नागरिकताका लागि इलाका प्रशासन कार्यालयमा जिल्ला प्रशासन कार्यालय वीरगन्जबाट अधिकृत सरहका कर्मचारीले हस्ताक्षर गर्न आउने गरेको जनाइएको छ ।
यसैगरी पर्साका १४ पालिकामा इलाका प्रशासन कार्यालय स्थापना गरी सञ्चालनमा ल्याउनुपर्ने माग पर्साका राजनैतिक दल तथा बुद्धिजीवीहरूको छ ।