बारा । बारा क्षेत्र नम्बर ४ का नेपाली कांग्रेसका उम्मेदवार श्याम बाबु गुप्ता ले महाशिवरात्रिको पावन अवसरमा परवानीपुर गाउँपालिका–५ अन्तर्गत बहुअरी कोठी टोलमा शिवधुनी बालेर धार्मिक तथा सांस्कृतिक कार्यक्रमको शुभारम्भ गर्नुभएको छ। हरेक वर्षझैँ यस वर्ष पनि स्थानीय बासिन्दाहरूको सक्रिय सहभागितामा शिवधुनी बाल्दै महाशिवरात्रि धुमधामका साथ मनाइएको हो।
धार्मिक विधिविधानअनुसार शिवधुनी बालिएपछि उपस्थित श्रद्धालुहरूले भगवान् शिवको पूजा–आराधना गर्दै शान्ति, समृद्धि र सुख–सम्पत्तिको कामना गरेका थिए। कार्यक्रमस्थलमा वैदिक मन्त्रोच्चारण, भजन–कीर्तन तथा प्रसाद वितरण गरिएको थियो। स्थानीय वृद्धवृद्धादेखि युवायुवतीसम्मको उल्लेख्य उपस्थिति रहेको कार्यक्रममा धार्मिक आस्थासँगै सामाजिक सद्भाव झल्किएको देखिन्थ्यो।
कार्यक्रमलाई सम्बोधन गर्दै उम्मेदवार गुप्ताले नेपाली समाजको धार्मिक र सांस्कृतिक पहिचान जोगाउनु सबैको साझा दायित्व भएको बताउनुभयो। उहाँले महाशिवरात्रिजस्तो पर्वले समाजमा आपसी भाइचारा, सहकार्य र नैतिक मूल्यलाई मजबुत बनाउने उल्लेख गर्दै यस्ता परम्परागत कार्यक्रम निरन्तर संरक्षण र प्रवर्द्धन गर्नुपर्ने धारणा राख्नुभयो।
स्थानीय बासिन्दाहरूले पनि गुप्ताको उपस्थितिलाई सकारात्मक रूपमा लिँदै धार्मिक कार्यक्रममा राजनीतिक नेतृत्वको सहभागिताले समुदायलाई थप एकताबद्ध बनाउने प्रतिक्रिया दिएका छन्। परवानीपुर–५ बहुअरी कोठी टोलमा शिवधुनी बाल्ने परम्परा लामो समयदेखि निरन्तर हुँदै आएको र यसले स्थानीय संस्कृति तथा पहिचानलाई जीवन्त राखेको उनीहरूको भनाइ छ।
महाशिवरात्रिको अवसरमा आयोजित यस कार्यक्रमले धार्मिक आस्था मात्र होइन, सामाजिक एकता र आपसी मेलमिलापको सन्देश समेत दिएको छ।
