पर्सा — पर्सा निर्वाचन क्षेत्र नम्बर–२ अन्तर्गत पर्सागढी नगरपालिका वडा नम्बर–५ पचरुखीमा राष्ट्रिय स्वतन्त्र पार्टी (रास्वपा) का उम्मेदवार सुशीलकुमार कानुले मंगलबार साँझ मतदातासँग प्रत्यक्ष संवाद कार्यक्रम गरेका छन्। निर्वाचन नजिकिँदै जाँदा मतदाताको घरदैलोमा पुगेर उनीहरूको आवाज सुन्ने उद्देश्यले आयोजना गरिएको कार्यक्रममा स्थानीयको उल्लेख्य सहभागिता रहेको थियो।
साँझको समयमा आयोजित उक्त संवाद कार्यक्रममा उम्मेदवार कानुले स्थानीय बासिन्दाका दैनिक जीवनसँग जोडिएका समस्या, आवश्यकता र अपेक्षाबारे ध्यानपूर्वक सुने।
मतदाताहरूले शिक्षा, रोजगारी, खानेपानी, स्वास्थ्य सेवा, सडक, सरसफाइ, कृषि तथा सिँचाइका समस्या राखेका थिए। विशेषगरी युवाहरूले रोजगारीको अभाव, वैदेशिक पलायन र सीपमूलक तालिमको आवश्यकता औंल्याएका थिए भने कृषकहरूले मल, बीउ, सिँचाइ र बजार व्यवस्थापनमा राज्यको ध्यान नपुगेको गुनासो गरेका थिए।
संवाद कार्यक्रममा बोल्दै उम्मेदवार कानुले देशमा लामो समयदेखि दोहोरिँदै आएको परम्परागत राजनीतिक अभ्यासले जनताका आधारभूत समस्या समाधान गर्न नसकेको टिप्पणी गरे। उनले रास्वपा वैकल्पिक राजनीतिक शक्तिका रूपमा जनताको आवाज संसद् र राज्यका निकायसम्म पुर्याउन प्रतिबद्ध रहेको बताए। “हामी भाषणका लागि होइन, समाधानका लागि राजनीतिमा आएका हौँ,” उनले भने, “पचरुखीका हरेक समस्या मेरा लागि प्राथमिकता हुन्।”
कानुले शिक्षा र स्वास्थ्यलाई आधारभूत अधिकारका रूपमा स्थापित गर्न रास्वपाले विशेष जोड दिएको उल्लेख गरे। उनले सरकारी विद्यालयको गुणस्तर सुधार, स्थानीय स्वास्थ्य संस्थाको सुदृढीकरण र युवाका लागि सीपमूलक तालिम तथा रोजगारी सिर्जना गर्ने योजनाबारे जानकारी गराए। साथै, सुशासन र भ्रष्टाचार नियन्त्रण बिना विकास सम्भव नभएको भन्दै पारदर्शी र जवाफदेही शासन प्रणाली निर्माण गर्ने प्रतिवद्धता व्यक्त गरे।
कार्यक्रममा सहभागी स्थानीयवासीहरूले प्रत्यक्ष संवादमार्फत आफ्ना कुरा राख्न पाएकोमा सन्तोष व्यक्त गरे। उनीहरूले लामो समयपछि उम्मेदवारले ध्यान दिएर समस्या सुनेको प्रतिक्रिया दिएका थिए। “हामीलाई चुनावको बेला मात्रै होइन, चुनावपछि पनि सम्झने नेता चाहिएको छ,” एक स्थानीय मतदाताले भने।
उक्त कार्यक्रममा रास्वपाका स्थानीय नेता–कार्यकर्ता, युवा, महिला तथा सर्वसाधारणको उल्लेख्य उपस्थिति रहेको थियो। पार्टीका स्थानीय प्रतिनिधिहरूका अनुसार आगामी दिनमा पनि पर्सा–२ का विभिन्न वडामा यस्ता संवाद तथा घरदैलो कार्यक्रमलाई निरन्तरता दिइनेछ।
रास्वपाले प्रत्यक्ष संवाद, सहभागितामूलक राजनीति र जनउत्तरदायी अभियानलाई आफ्नो प्रमुख रणनीति बनाएको जनाएको छ।
