वीरगञ्ज । ग्रिनसिटी सामुदायिक सेवा केन्द्र आदर्शनगरले न्यानो कम्बल वितरण गरेको छ । बढ्दै गरेको चिसोलाई मध्यनजर गर्दै वीरगञ्जको वडा प्रहरी कार्यालय विर्ताको हिरासत कक्षका थुनुवा तथा अन्य विपन्न असहाय व्यक्तिहरुलाई न्यानो कम्बल वितरण गरिएको हो ।
ग्रिनसिटी सामुदायिक सेवा केन्द्र आदर्शनगरका अध्यक्ष जयप्रकाश खेतान, कोषाध्यक्ष ज्योती रुंगटाले वडा प्रहरी कार्यालय विर्ताका प्रमुख प्रहरी निरीक्षक पुष्कर बोगटीलाई ५० थान कम्बल हस्तान्तरण गरेका हुन् । कम्बल वितरणका लागि व्यवसायी एवम् समाजसेवी पवन रुंगटाले सहयोग गरेका छन् ।
हरेक वर्ष जस्तै यस वर्ष पनि चिसो मौसममा गरिब तथा विपन्न व्यक्तिहरुलाई कम्बल बाँड्ने अभियानलाई ग्रिनसिटी सामुदायिक सेवा केन्द्रले निरन्तरता दिएको केन्द्रका अध्यक्ष जयप्रकाश खेतानले बताए । उनकाअनुसार आइतबारबाट सुरु भएको कम्बल वितरण अभियानलाई अन्य क्षेत्रमा पनि निरन्तरता दिइनेछ ।
वीरगञ्जका ग्रामिण क्षेत्रसँगै अन्य आवश्यक पर्ने निकायमा पनि कम्बल वितरण गर्ने योजना रहेको खेतानले बताए ।
