वीरगञ्ज । परिक्षा शूल्क तिर्न नसकेका विद्यार्थीलाई परिक्षामा सहभागी हुनबाट वञ्चित नगर्न वीरगञ्ज महानगरपालिकाले आग्रह गरेको छ ।
स्थानीय केही संस्थागत (निजी) विद्यालयहरुले आगामी दिनहरुमा अनुसूचित परिक्षामा शूल्क तिर्न नसकेका विद्यार्थीहरुलाई परिक्षामा सहभागी हुनबाट वञ्चित गर्न लागेको जानकारी पाएपछि महानगरपालिकाले त्यस्तो नगर्न आग्रह गरेको हो ।
महानगरअन्तर्गत शैक्षिक प्रशासन महाशाखाले प्रमुख (मेयर) राजेशमान सिंहको निर्देशनअनुसार बुधबार एउटा सूचना जारी गर्दै शूल्क तिर्न बाँकी रहेका विद्यार्थीहरुलाई परिक्षा दिनबाट वञ्चित नगर्न आग्रह गर्दै शूल्कका लागि अभिभावकसँग समन्वय गर्न आग्रह गरेको छ ।
‘महानगरपालिकाअन्तर्गत सञ्चालित कतिपय संस्थागत विद्यालयहरुमा अध्ययनरत विद्यार्थीहरुलाई शूल्क तिर्न बाँकी रहेकोले परिक्षाबाट वञ्चित गराइएको भनी जानकारी प्राप्त भएकोले बक्यौता शूल्कको लागि सम्बन्धित अभिभावकसँग समन्वय गर्न हुन् तथा शूल्ककै नाममा कुनैपनि विद्यार्थीलाई परिक्षाबाट वञ्चित नगराउन हुन्’, जारी सूचनामा उल्लेख गरिएको छ ।
चैत्र महिनामा स्थानीय निजी विद्यालयहरुले लिने वार्षिक परिक्षामा शूल्क तिर्न नसकेको विद्यार्थीहरुलाई परिक्षामा सहभागी हुनबाट वञ्चित गर्दै आएका छन् ।
