विद्यार्थी समूहले मंगलबार नगरपालिका कार्यालयमा तोडफोड

बारा —विद्यार्थी समूहले मंगलबार नगरपालिका कार्यालयमा तोडफोड गरेको छन् । बाराको सिम्रौनगढ नगरपालिका कार्यालयमा विद्यार्थी समूहले तोडफोड गरेको हुन् । भ्रमण खर्च नदिएको भन्दै कचोर्वा, कंकाली, खजानी माद्यमिक विद्यालयलगायत कक्षा ९ र १० का विद्यार्थीहरूले नगर कार्यालयमा तोडफोड गरेर क्षति पुर्‍याएका हुन् ।
कार्यालयका झ्याल, ढोका, कम्प्युटर, फर्निचर, अरू विद्युतीय उपकरण, गाडी, टिभी, एसी, सोफालगायतमा तोडफोड गरिएको नगरपालिकाका अधिकारीले जनाए ।

ती अधिकारीका अनुसार लाखौैं रुपैयाँ बराबरको धनमाल क्षति भएको प्रारम्भिक अनुमान छ ।
भ्रमण खर्च माग्न विद्यार्थीहरु नगर प्रमुख किशोरी साह कलवारलाई भेट्न गएका थिए । तर नगर प्रमुख कलवारले डेंगुको प्रकोप फैलिरहेकोले अहिले भ्रमणमा नजान र दसैं नजिक विद्यालयमार्फत बजेट उपलब्ध गराइदिने विद्यार्थीलाई आश्वासन दिएका थिए । तर, विद्यार्थी समूहले मेयर साहको कुरा अटेर गर्दै कार्यालयमा अन्धाधुन्द तोडफोड गरेको प्रत्यक्षदर्शीले बताएका छन् । विद्यार्थीहरूले ढुंगामुढासमेत गरेका थिए ।
नगर कार्यालय तोडफोडको सूचनापछि सशस्त्र प्रहरी बल र नेपाल प्रहरी घटनास्थल पुगेर विद्यार्थीहरुमाथि सामान्य बल प्रयोग गरेको छ । लाठीचार्जले केही विद्यार्थी घाइते भएका छन् ।