पाल्पा, पूर्वखोला – पाल्पाको पूर्वखोला गाउँपालिका–५, वीरकोटमा बोलेरो जीप दुर्घटना हुँदा दुई जनाको मृत्यु भएको छ भने चालक गम्भीर घाइते भएका छन्।
जिल्ला प्रहरी कार्यालय पाल्पाका अनुसार आर्यभञ्ज्याङदेखि रामपुरतर्फ जाँदै गरेको लु १ च ६७५६ नम्बरको बोलेरो जीप झन्डै ३ सय मिटर तल खसेको थियो।
मृतकमध्ये एक ४६ वर्षीय विनोद ढुंगाना रहेको पुष्टि भएको छ। ढुंगाना बगनासकाली गाउँपालिका–१, चिर्तुङ्धारा गाप्टुङ घर भई हाल बुटवल उपमहानगरपालिका–११, मझुवामा बस्दै आएका थिए। अर्का मृतकको पहिचान खुलेको छैन तर उनी अन्दाजी ४५ वर्षका पुरुष भएको प्रहरीको भनाइ छ।
ढुंगानाको लुम्बिनी मेडिकल कलेज, प्रभासमा उपचारको क्रममा र अर्को व्यक्तिको तानसेनस्थित मिसन अस्पतालमा मृत्यु भएको हो।
दुर्घटनामा चालक राजु खड्का (३०), बुटवल उपमहानगरपालिका–११ गम्भीर घाइते भएका छन्। उनको लुम्बिनी मेडिकल कलेजमा उपचार भइरहेको छ।
घटनास्थलमा इलाका प्रहरी कार्यालय पूर्वखोला र प्रहरी चौकी ताँहुबाट प्रहरी टोली खटिएको थियो। स्थानीयको सहयोगमा घाइतेको उद्धार गरिएको हो।
प्रहरीका अनुसार दुर्घटनाको कारण खुल्न बाँकी रहेको र अनुसन्धान जारी रहेको छ।
