कलैया, बाराः जबरजस्ती करणीको घटनालाई मिलापत्र गराउँदै दबाब दिने आरोपमा बाराका दुई जना वडाध्यक्ष प्रहरीको नियन्त्रणमा परेका छन्। जिल्ला प्रहरी कार्यालय बाराले सिम्रौनगढ नगरपालिका–३ का वडाध्यक्ष ऐतुउल्लाह अन्सारी र बारागढी गाउँपालिका–६ का कार्यवाहक वडाध्यक्ष रामेश्वर पंडितलाई बिहीबार दिनभर नियन्त्रणमा लिई सोधपुछ गरेपछि हाजिर जमानीमा छाडेको हो।
१४ वर्षीया बालिकामाथि जबरजस्ती करणी, घटनालाई ढाकछोप गर्न जनप्रतिनिधिको सक्रियता
जेठ २४ गते, सिम्रौनगढ नगरपालिका–३ मा धार्मिक कार्यक्रमका कारण परिवार छिमेकीको घरमा रहेको बेला १४ वर्षीया बालिकालाई टोलकै २० वर्षीय युवकले जबरजस्ती करणी गरेको स्थानीयहरूले बताएका छन्। घटनापछि युवकको परिवारबाट रकम लिएर वडाध्यक्ष अन्सारीले गाउँमै मिलापत्र गराउन खोजेको, र पीडित परिवारलाई दिनहुँ दवाब दिइरहेको आरोप लागेको छ।
दुई लाख ५० हजार रुपैयाँको मिलापत्र सम्झौता प्रयास
स्थानीयका अनुसार, आरोपी युवकको परिवारबाट २ लाख ५० हजार रुपैयाँ जरिवाना गराउने सहमति गर्न खोजिएको थियो, जसमा पीडित परिवारलाई ८० हजार रुपैयाँ दिइने र बाँकी रकम वडाध्यक्षसहितले बाँडफाँट गर्ने योजना रहेको खुलेको छ। यस प्रकारको आपराधिक गतिविधिमा वडाध्यक्षको संलग्नताले स्थानीयवासी आक्रोशित भएका छन्।
दोस्रो घटना : अशक्त महिलामाथिको बलात्कार ढाकछोप गर्न अर्का वडाध्यक्षको प्रयास
बारागढी गाउँपालिका–६ का कार्यवाहक वडाध्यक्ष रामेश्वर पंडितमाथि पनि एक शारीरिक अशक्त महिलामाथि जबरजस्ती करणी गर्ने व्यक्तिलाई बचाउन प्रयास गरेको आरोप लागेको छ। महिलाको परिवारले प्रहरीमा उजुरी दिएपछि उनलाई पनि नियन्त्रणमा लिई सोधपुछ गरिएको थियो।
प्रहरीको भनाइ : ‘दोषी जो कोही भए पनि कारबाही हुन्छ’
दुवै वडाध्यक्षलाई प्रारम्भिक अनुसन्धानपछि हाजिर जमानीमा छाडिएको प्रहरी स्रोतले जनाएको छ। प्रहरीले भने आवश्यक परेको खण्डमा उनीहरूलाई पुनः बोलाइने र दोषी पाइएमा जनप्रतिनिधिमात्र नभई जो–कोहीलाई कानुनी कारबाही गरिने प्रतिबद्धता जनाएको छ।
जनप्रतिनिधिबाटै पीडकमाथि दबाब र मिलापत्रको कसरत — न्याय माग्दै पीडित परिवार
एकातिर कानुनले बलात्कारजस्ता गम्भीर अपराधमा शून्य सहनशीलताको नीति अपनाएको भनिन्छ, अर्कातिर जनप्रतिनिधिहरुकै संलग्नतामा पीडकमाथि दबाब दिइनु न्याय प्रणालीप्रति प्रश्न उठाउने कार्य भएको स्थानीयको प्रतिक्रिया छ। पीडित परिवारले निष्पक्ष अनुसन्धान र अपराधीलाई कडा कारबाहीको माग गरेका छन्।
