बाराको परवानीपुर गाउँपालिका स्थित अन्नपूर्ण भेजिटेबल प्रा.लि. उद्योगबाट फैलिएको विषादीयुक्त वायु प्रदूषण र फोहोर पानीको दुर्गन्धले स्थानीय बस्तीमा गम्भीर संकट उत्पन्न गरेको छ। स्थानीय बासिन्दा सास फेर्न समेत कठिन भएको भन्दै आक्रोश पोखिरहेका छन्। उद्योगबाट निस्कने कालो धुवाँ र दुर्गन्धले पैदल यात्रु, घरधुरी, विद्यालय र सवारी आवागमन सबै प्रभावित भएका छन्।
प्रदूषणले स्वास्थ्यमा गम्भीर असर, प्रशासन मौन
स्थानीयको गुनासो अनुसार, उद्योगको लापरवाहीका कारण बस्तीमा श्वासप्रश्वास, आँखा पोल्ने, छालाको समस्या देखिन थालेको छ। तर, सम्बन्धित निकाय चुपचाप बसेको र सुनुवाइ नभएकोमा आक्रोश चुलिँदै गएको छ।
“हामीलाई सास फेर्न पनि गाह्रो छ” — आक्रोशित स्थानीयबासी
बनस्पति घ्यू र तेल उत्पादन गर्ने त्रिवेणी समूहको लगानीमा सञ्चालित यो उद्योग २४ घण्टा सञ्चालनमा रहेकाले प्रदूषण निरन्तर बढिरहेको छ। उद्योग वस्तीको बिचमै रहेको हुँदा यसको प्रत्यक्ष असर बालबालिकादेखि वृद्धसम्म सबैमा परेको छ। धुवाँको प्रमाणसहित उजुरीहरू सरकारी निकायहरूमा दर्ता गरिए पनि कुनै ठोस कारबाही नभएको गुनासो छ।
उद्योगको चिम्नीबाट सिधा बस्तीमा कालो धुवाँ, प्रशासनको चुप्पी
प्रत्यक्षदर्शी र भिडियो फुटेजहरूमा उद्योगको चिम्नीबाट निस्किएको कालो धुवाँ बस्तीमा सिधै पसिरहेको देखिन्छ। गाउँपालिका, प्रहरी र जिल्ला प्रशासन कार्यालयमा पटक–पटक उजुरी दिइएको भए पनि सम्बन्धित निकायको निष्क्रियता स्पष्ट देखिएको छ।
पालिका अध्यक्षको चेतावनी : बेवास्ता नगरियोस्
परवानीपुर गाउँपालिकाका अध्यक्ष रामक्षत्री प्रसाद कुर्मीले भने,
> “अन्नपूर्ण भेजिटेबल उद्योगबाट निस्कने धुवाँ अत्यन्त हानिकारक छ। हामीले पटक–पटक पत्राचार गर्दा पनि उनीहरूले बेवास्ता गरिरहेका छन्।”
उनका अनुसार मानव बस्तीको बीचमा सञ्चालन भइरहेको उद्योगले वातावरणीय प्रभाव मूल्यांकन (EIA) नपु¥याएको भए तुरुन्त बन्द गर्नुपर्ने आवश्यकता छ।
प्रशासन असफल, विश्वास गुमाउँदै स्थानीय
बाराका प्रमुख जिल्ला अधिकारी बसन्त अधिकारी भन्छन्,
“धुवाँका कारण वायु प्रदूषण भएको उजुरीको अनुसन्धान भइरहेको छ। केही उद्योगले विषालु पदार्थ नदीमा मिसाएको पुष्टि भए पनि अन्नपूर्ण भेजिटेबलप्रति ठोस कारबाही भएको छैन।”
यसले प्रशासनको निष्क्रियता, दबाब र प्राथमिकता प्रति गम्भीर प्रश्न उठाएको छ। यदि राज्य संयन्त्र यस्तै मौन रहिरह्यो भने स्थानीयवासीद्वारा सशक्त आन्दोलन चाँडै सुरु हुने चेतावनी दिइएको छ।
निष्कर्ष
परवानीपुरमा उद्योगजन्य प्रदूषणले स्वास्थ्य संकट निम्त्याएको पुष्टि भइरहेका बेला पनि सरकारी बेवास्ता र उदासीनता झनै खतरनाक बन्दै गएको छ। अब संवेदनशीलता र कठोर कानुनी कारबाही नगरे जनस्वास्थ्य र वातावरणको मूल्य अत्यन्त महँगो पर्नेछ।
सभार – रेस खबरबाट
