काठमाडौं,०२ चैत । नेपाल विद्यार्थी संघ केन्द्रीय समितिले स्वतन्त्र विद्यार्थी युनियनको चुनावी घोषणापत्र सार्वजनिक गरेको छ । नेविसंघ केन्द्रीय समितिले आज (बिहीबार) पत्रकार सम्मेलन गर्दै घोषणापत्र सार्वजनिक गरेको हो।
जारी घोषणापत्रको ‘नेविसंघको अबको शिक्षा नीति’ खण्डमा उल्लेख गरिएको छ–‘लोकतान्त्रिक मूल्य मान्यता स्थापित हुनेगरी ज्ञानवर्द्धक र जीवन उपयोगी शिक्षा लागू गर्नुपर्दछ । नेविसंघ शिक्षालाई चेतना, मस्तिष्क, प्रतिभा र सिर्जनशीलताको विकासको आधार ठान्दछ।’
नेविसंघले सबै विद्यार्थीहरूको अनिवार्य निःशुल्क स्वास्थ्य बिमा गराउनदेखि विद्यार्थीहरूलाई प्रविधिमैत्री हेल्थ कार्ड उपलब्ध गराउने संकल्पसमेत लिएको छ ।
अपांगमैत्री शिक्षालय, छात्रवृत्तिको न्यायोचित वितरण, स्वच्छ पर्यावरण र सुन्दर वातावरण, स्वदेशमै शिक्षा अनि स्वदेशमै भविष्य, विद्यार्थी सहुलियतको विशेष प्याकेज लगायतका संकल्प नेविसंघले लिएको छ ।
संघले माध्यमिक शिक्षा सबै नेपालीका लागि अनिवार्य र निःशुल्क बनाउने र उच्च शिक्षा सबैको पहुँचमा, गुणस्तरीय र सर्वसुलभ हुँदै क्रमशः नि:शुल्क बनाउने अठोट लिएको कुरा प्रतिबद्धतामा राखेको छ ।
घोषणापत्रमा नेविसंघले ‘के गर्ने’ र के नगर्ने भन्दै नीतिगत घोषणा पनि गरेको छ । जसअनुसार गर्ने कुरामा विश्वविद्यालय ऐन निर्माणको नेतृत्व गर्ने, सस्टेनेबल प्राक्टिसेस र वातावरण संरक्षण अभियानको नेतृत्व गर्ने, महँगी, कालोबजारी र भ्रष्टाचारको अन्त्य गर्ने, सबै शिक्षालयमा स्टुडेन्ट रिसर्च युनिटको स्थापना गर्ने कुरा छ ।
यस्तै, नगर्ने कुरामा भने विद्यार्थीको सामूहिक हितविपरीत कुनै पनि र व्यक्तिगत स्वार्थका निमित्त सम्झौता नगर्ने, कुनै पनि दुर्व्यवहार, सामाजिक असंगतीलगायतको गतिविधिमा संलग्नता नगर्ने कुरा छन् ।
घोषणापत्र सार्वजनिक गर्दै संघका अध्यक्ष दुजाङ शेर्पाले विद्यार्थीहरूको आन्दोलनमार्फत देशको व्यवस्था परिवर्तन भए पनि विश्वविद्यालयको अवस्था परिवर्तन हुन नसकेको बताए ।
अध्यक्ष शेर्पाले लामो समयसम्म स्ववियु निर्वाचन हुन नसक्दा विश्वविद्यालयमा विविध समस्या देखापरेको बताए । ‘व्यवस्था परिवर्तन भएपछि पनि अझैपनि विश्वविद्यालयको अवस्था परिवर्तन हुन सकेको छैन ।
आज सानो–सानो कुराहरू समयमा परीक्षा नहुने, समयमा नतिजा नआउने र लामो समयसम्म विद्यार्थीहरूले नतिजा कुर्नुपर्ने, नतिजा कुर्दाकुर्दै खाडी देशमा जानुपर्ने अवस्था हामीले देखिरहेका छौं,’–उनले भने ।
अहिले नेविसंघभित्र रहेका असन्तुष्टि र समस्या स्ववियु निर्वाचनपछि बसेर टुंग्याउन पनि उनले असन्तुष्ट पक्षसँग आग्रह गरे । आगामी चैत्र पाँच गते हुँदै गरेको स्ववियु निर्वाचनमा सहयोग गर्न उनले नेविसंघका सबै विद्यार्थी तथा नेताहरूलाई आग्रह गरे ।
‘केही साथीहरूमा असन्तुष्टि छ भने सबै कुराहरू स्ववियु चुनावपछि हामी सबै जना बसेर बहस र छलफलबाट टुंग्याऔंँ । सबैजना एकीकृत भएर यसलाई सफल बनाऔं ।
यो चौध वर्षपछि हुन लागेको स्वतन्त्र विद्यार्थी संगठनको निर्वाचनलाई अझैपनि धेरै ठाउँबाट भाँड्ने काम हुँदैछ । यो स्ववियु निर्वाचन कुनैपनि हालतमा भाँडिनुहुँदैन । यदि, त्यस्तो प्रपञ्च भयो भने त्यसको प्रतिकार नेविसंघले गर्छ । सबै साथीहरूलाई यसको प्रतिकार गर्न तम्तयार भएर बस्न आग्रह गर्छु,’–उनले भने ।
