वीरगञ्ज, २८ कार्तिक । वीरगञ्ज महानगरपालिकाका पूर्व मेयर बिजय कुमार सरावगी पनि जसपा एमालेको गठबन्धनलाई जिताउन खुलेर लागेका छन् । पर्साको क्षेत्र नम्बर १ बाट जनता समाजवादी पार्टी (जसपा) र नेकपा एमालेको गठबन्धनका उम्मेदवारलाई जिताउन सरावगी खुलेरै लागेका हुन् ।
यसअघि पर्साको क्षेत्र नम्बर २, ४ मा गएर जसपा र एमाले गठबन्धनका उम्मेदवारलाई जिताउन मत अपिल गरेका सरावगीले आज क्षेत्र नम्बर १ का उम्मेदवारसँग पनि घरदैलो गरेका छन् ।
यसअघि केही कांग्रेसी नेताले सरावगी जसपा र एमाले गठबन्धनको विरोधमा रहेको भनी भ्रम छरेपनि त्यो गलत साबित भएको छ ।
पर्साको क्षेत्र नम्बर १ बाट प्रतिनिधि सभा सदस्यका उम्मेदवार प्रदीप यादव र क्षेत्र नम्बर ४ (क) बाट प्रदेश सभा सदस्यका उम्मेदवार बिचारी प्रसाद यादवलाई जिताउन सरावगी वीरगञ्ज महानगरपालिका वडा नम्बर २३ सबैठवामा पुगेका छन् ।
सबैठवामा जसपा र एमालेको सयुँक्त घरदैलोका क्रममा सहभागी सरावगीले जसपा र एमालेको गठबन्धनको जित अपरिहार्य भएको बताए । पाँच दलीय सत्ता गठबन्धनलाई परास्त गर्नका लागि पनि जसपा र एमालेको गठबन्धनले जित्नुपर्ने सरावगीको भनाई छ ।
सो अवसरमा नेकपा एमालेका नेता डा. बिशम्भर शर्मा, शम्भु प्रसाद गुप्ता, प्रदेश सभा सदस्यका उम्मेदवार बिचारी यादव लगायत जसपा र एमालेका नेता एवम् कार्यकर्ताहरुको उल्लेख्य उपस्थिती रहेको थियो ।
