वीरगन्ज, १७ कार्तिक : पर्सा क्षेत्र नम्बर २ मा सत्ता गठबन्धनले चुनावी प्रचार प्रसारलाई बिहीबार दे्खि झन तिब्र पारेको छ । निर्वाचन आयोगले कात्तिक १७ गते अर्थात बिहीबार देखि दल र उम्मेदवारले चुनावी सभासम्मेलन, कोणसभा , सभा इत्यादि गर्न पाउने अनुुमति दिएसंगै पर्सा २ मा सत्तागठबन्धनका उम्मेदवारहरुले पनि बिहीबार देखि चुनावी प्रचार प्रसारलाई अझ तिब्र पारेका हुन् ।
बिहीबार बिहान वीरगन्ज महानगरपालिका वडा नम्बर १७ अलौंमा काँग्रेसबाट प्रतिनिधीसभा सदस्य उम्मेदवार अजय चौरसिया र लोसपाबाट प्रदेशसभा सदस्य उम्मेदवार रमेश कुर्मीले घरदैलोमै पुगेर मतदातालाई भेटेका छन् । त्यसक्रममा स्थानीय र मतदाताहरुले दुवै उम्मेदवारलाई फूलमाला लगाएर स्वागत गर्दै यसपालि आफुहरुले गठबन्धनकै उम्मेदवारलाई जिताउने बताए ।युवा देखि बृद्धबृद्धा मात्र नभइ गृहिणी महिलाहरुले पनि यसपालिको आफनो रोजाई चौरसिया र कुर्मी नै भएको भन्दै समर्थनमा नारा पनि लगाएको घरदैलोमा सहभागी काँग्रेसका क्षेत्रीय सभापति महम्मद शाहबुद्धिनले जानकारी दिए ।
मतदाताहरुको स्वागतबाट उत्साहित प्रतिनिधीसभा सदस्य चौरसियाले आफना क्षेत्रका जनताको जीवनस्तरमा सुधार नै मुख्य लक्ष्य रहेको बताए । किसान र मजदुरहरूको आर्थिक समुन्नति पनि प्रमुख प्राथमिकतामा रहेको भन्दै चौरसियाले भने ,‘ सहरसँग बाटोघाटो जोडिँदा र उद्योगहरू खुल्दा त्यसबाट सबैभन्दा बढी किसान र मजदुर वर्ग लाभान्वित हुन सक्नुपर्छ, अन्यथा यी विकासका पूर्वाधारहरूबाट उच्च वर्ग÷ ठूला व्यापारीले मात्र फाइदा लिने स्थिति बन्छ , त्यस कारण विकासका यी पूर्वाधारहरूलाई न्यून आय भएका मजदुर÷किसानको आर्थिक स्तरोन्नतिको आधार बनाउन म सधैं नै प्रतिबद्ध र सक्रिय रहन्छु ।
उनले मधेसको मसिहा बताउदै आएको जसपा अहिले सिटको लोभमा मधेस विरोधी एमालेसंग अपबित्र गठबन्धन गरेकाले अब जसपा पनि मधेस विरोधीकै कित्तामा उभिएकाले मधेसी जनताबाट बहिष्कृत हुने बताए ।
चुनावी घरदैलो कार्यक्रममा प्रदेशसभा सदस्य उम्मेदवार रमेश कुर्मी , काँग्रेसका क्षेत्रीय सभापति महम्मद शाहबुद्धिन , काँग्रेस जिल्ला कार्य समिति सदस्य पण्डित पुरुषोत्तम दुबे , काँग्रेसका नगर सचिव रन्जित पटेलका साथै लोसपाका पनि नेता कार्यकर्ताहरुको सहभागीता थियो ।
