बारामा विजय जुलुस निकाल्ने क्रममा दुई पक्षबीच झडप

बारामा विजय जुलुस निकाल्ने क्रममा दुई पक्षबीच झडप भएको छ । झडपमा परी प्रहरी सहायक निरीक्षक सहित १५ जना घाईते भएका छन् । महागढीमाई नगरपालिकामा नेपाली काँग्रेसले निकालेको विजय जुलुसमा झडप भएको प्रहरीले जनाएको छ । झडपमा बाराको आदर्शकोतवाल गाउँपालिका–१ चिउताहा घर भएका प्रहरी सहायक निरीक्षक ४० वर्षीय मनोज साह घाईते भएका छन् । जिल्ला अदालत चितवन दरबन्दी भई हाल उनी विपद व्यावस्थापन पर्सामा कार्यरत छन् ।
महागढीमाई न.पा.२ ईनर्वा टोल बस्ने २२ वर्षीय उपेन्द्र प्र.यादव, २८ वर्षीय सरदा शंकर प्र.यादव, ६५ वर्षीया लालु देवी, ५० वर्षीया उषा देवी, १ वर्षीय दिना माझी, १५ वर्षीया चान्सी कुमार यादव घाईते भएका छन् । महागढीमाई– नं.१ सिमरा तिलगछीया टोल बस्ने ६५ वर्षीय मगनी राउत अहिर, १८ वर्षीय गुडु कुमार लहेरा, वडा नं.६ बारवा टोलका ५० वर्षीय जगदिश यादव पनि घाईते भएको प्रहरीले जनाएको छ ।
त्यसैगरि वडा नं.२ ईनर्वा टोल बस्ने १८ वर्षीय राज यादव, ३२ वर्षीय संजय कार गुप्ता, १३ वर्षीय चान्सी कार यादव ६५ वर्षीय लाल यादव पनि घाईते छन् ।
एक्स रे गराएर हेर्दा प्रसनी साहको छातीको दाहिने तर्फको हड्डीमा असर देखिएको छ । अन्य घाईतेहरुको अवस्था सामान्य छ । उनीहरु प्रादेशिक अस्पताल कलैयामा उपचार पछि घर फर्किएका छन् ।
प्रहरीका अनुसार दिउँसो साढे ३ बजेतिर महागढीमाई नगरपालिकका नगर प्रमुख उपेन्द्र यादव सहितको विजय जुलुस वडा नं २ ईनर्वा टोलमा पुगेको थियो । जुलुसमा सहभागीले अपशब्द प्रयोग गरेको, स्थानियलाई जिस्क्याएको भन्दै स्थानीय आक्रोशमा आएका थिए । सोही विषयमा भएको विवादले उग्ररुप लिएर झडपमा परिणत भएको थियो । प्र.स.नि.साह समेत घाईते भएपछि स्थिति नियन्त्रणमा लिनका लागि प्रहरीले ६ राउण्ड अश्रुग्याँस प्रहार गरेको जिल्ला प्रहरी कार्यालय बाराका प्रवक्ता प्रहरी नायब उपरीक्षक राजेश थापाले जानकारी दिए ।
झडपपछि मेयर यादव सहितको विजय जुलुसले महागढीमाई क्षेत्र परिक्रमा गरेको थियो । महागढीमाई नगरपालिकामा मेयर र उपमेयर दुवै पदमा काँग्रेसले जितेको छ । भने वडा नम्बर २ को वडा अध्यक्षमा नेकपा एमाले र सदस्यमा जसपा विजयी भएको छ ।
स्थानीयले भने गाउँमा जोड जोडले डिजे नबजाउन आग्रह गर्दा नेपाली काँग्रेसका कार्यकर्ताहरुले कुटपिट गरेको आरोप लगाएका छन् ।