काठमाडौं गोर्खाजको सहायक प्रशिक्षकमा वीरगन्जका प्रकाश शर्मा नियुक्त

वीरगन्ज । काठमाडौं गोर्खाजको सहायक प्रशिक्षकमा वीरगन्जका प्रकाश शर्मा नियुक्त भएका छन् । वीरगन्ज महानगरका चर्चित क्रिकेट प्रशिक्षक (कोच) प्रकाश शर्मा नेपाल प्रिमियर लिग (एनपीएल) खेल्न लागेको काठमाडौं गोर्खाजको सहायक प्रशिक्षकमा नियुक्त भएका छन् ।

राष्ट्रिय क्रिकेट टिमका सहायक प्रशिक्षक समेत रहेका शर्मालाई काठमाडौं गोखार्जले टिमको सहायक प्रशिक्षकमा नियुक्त गरेको हो । उक्त टिमका प्रमुख प्रशिक्षक भैरहवा निवासी पूर्व राष्ट्रिय खेलाडी बसन्त शाही रहेका छन् । उक्त टिमको कप्तान भने राष्ट्रिय खेलाडी करण केसी रहेका छन् ।

कठमाडौं गोखार्जको सहायक प्रशिक्षकमा नियुक्त शर्मा ,वीरगन्ज महानगरपालिका वडा नम्बर ४ विर्ताका स्थायीबासीन्दा हुन् । उनि मधेस प्रदेश क्रिकेट टिम र पर्सा क्रिकेट संघको सिनियर प्रशिक्षकपनि हुन् । शर्मा हाल वीरगन्ज महानगरपालिकाको खेलकुद विभाग प्रमुखका रुपमा कार्यरत छन् ।

झण्डै दुई दशकदेखि क्रिकेट खेलमा अनवरत रुपमा सकृय शर्माले सन् २०१२ मा काठमाडौंमा कोचिंग कोच लेभल १ र सन् २०१३ मा मलेशीयामा लेभल २ को प्रशिक्षणसमेत लिएका थिए ।विक्रम संवत २०५७ सालमा पाकिस्तानमा भएको यू–१७ एशियाकप क्रिकेटमा शर्माले नेपाली राष्ट्रिय टिमबाट सहभागीता जनाएर उत्कृष्ट प्रदर्शन गरेका थिए ।

यहि मंसिर १५ गतेदेखि सुरु हुन लागेको नेपाल प्रिमियर लिग ९एनपीएल० मा काठमाडौं गोर्खाज सहित कूल ८ टिम सहभागी हुदैछन् ।